မုဒုံတန်ဆောင်တိုင်

လူများ စတင်စည်ကားစပြုလာသော မုဒုံမြို့ တန်ဆောင်တိုင်ည မြင်ကွင်း (လမ်းမကြီးအ၀ိုင်း ညနေ-၇း၀၀) နာရီ

ဘော်ဒါတို့ရေ မုဒုံတန်ဆောင်တိုင်ကတော့ ညက စည်စည်ကားကားနဲ့ ပြီးဆုံးသွားပါပြီ.. လဆန်း (၁၃) ရက်နေ့ညနေ (၆း၃၀) လောက်မှာ ရွာသွန်းခဲ့သည့် မိုးသည်းထည်မှုကြောင့် (၁၄) ရက်နေ့ည တန်ဆောင်တိုင်ပွဲတော်ဟာ မိုးထိတော့မယ်လို့ မူလက ခန့်မှန်းထားကြပေမယ့် တန်ဆောင်တိုင်ည (၆း၀၀) နာရီလောက်မှ မိုးနည်းနည်း အုပ်ဆိုင်းတာကလွဲပြီး မိုးမရွာခဲ့ပဲ ည (၇း၀၀) နာရီအချိန် မှာတော့ ကောင်းကင်မှ တိမ်တွေကင်စင်ပြီး လမင်းဟာ ယခင်နှစ်များလို ထွန်းလင်းပေးခဲ့တဲ့ အတွက် မုဒုံတန်ဆောင်တိုင်ပွဲကို ပျော်ပျော်ရွှင်ရွှင်နဲ့ပဲ ယှဉ်နွှဲခဲ့ကြပါတယ်... 

    

          ဒီနှစ်တန်ဆောင်တိုင်မှာ စတင်တေးဂီတအဖြစ် (လေးဇီးကလပ်၊ ဘစ်ဘတ်  တေးဂီတအဖွဲ့နဲ့အတူ) အယ်လွန်းဝါ၊ ဟန်ထူးလွင်၊ ပူစူး၊ အေသင်ချိုဆွေ စသည့်နာမည်ကြီးအဆိုတော်တွေ ပါဝင်တီဆို   ဖျော်ဖြေခဲ့ပြီးတော့ မော်ဒယ်သရုပ်ဆောင် ခေမီကိုနဲ့အဖွဲ့လည်း ပါဝင်ခဲ့ပါတယ်..

         မူလက မိုးရိပ်တွေကြောင့် မစည်းကားတော့မလိုဖြစ်ခဲ့ပေမယ့် ည (၈း၀၀) နာရီဝန်းကျင်မှာတော့ ယခင်နှစ်များလိုပဲ မော်-သံလမ်းတစ်လျှောက်မှာ မြို့ခံတွေနဲ့ ကျေးရွာတွေက တက်လာသည့် ပရိတ်သတ် တွေနဲ့ တန်ဆောင်တိုင်ညဟာ အသက်ဝင်ခဲ့ပါတယ်.. ည (၇း၀၀) နာရီမှ မသိုးသင်္ကန်း ရက်လုပ်ယှဉ်ပြိုင်ပွဲကို ယခင်နှစ်တွေကလိုပဲ ကျေးရွာ/ရပ်ကွက်အလိုက်ယှဉ်ပြိုင်ပြီးတော့ ည (၈း၀၀) နာရီမှ ပြီးဆုံးခဲ့ပါတယ်..

          ဒါပေမယ့် ယခင်နှစ်မှာ မီးထွန်းခဲ့တဲ့ ဗိုလ်ချုပ်လမ်း (သင်္ဘောဦးထိပ်မှ ဆေးရုံထိပ်အထိ)၊ စက်သစ်ရပ် မြစေတီလမ်း (အောင်ပြည်သာရှေ့လမ်းဝမှ ကင်ချွန်းဘုရား (မြစေတီဘုရားအထိ)၊ မြနန်ဒါလမ်း (ဒေါ်သန်းမြင့်ဘော်ဒါဆောင်လမ်း)၊ မင်းတန်းဗိုလ်ချုပ်လမ်း (သင်္ဘောဦးထိပ်မှ ကျောက်တိုင်ထိ)၊ တပင်ရွှေထီးလမ်း (ကျောက်ဝိုင်းကျောင်းလမ်းဝမှ စာစင်လမ်းမကြီးကျောင်းရှေ့လမ်းဝအထိ)၊ မော်-သံလမ်း (စာစင်လမ်းမကြီးကျောင်းရှေ့မှ မုဒုံမြို့ဝင်အထိ)၊ ဘုရားလေးဆူရပ် (ဗိုလ်ချုပ်လမ်းတစ်လျှောက်) နေရာတွေမှာ မီးထွန်းခဲ့ခြင်းမရှိတော့တဲ့ အတွက်ကြောင့်လည်း အဲဒီနေရာတွေဟာ အစောပိုင်းနဲ့ ညနက်ပိုင်းတွေမှာ   ခြောက်ကပ်ကပ်ဖြစ်ခဲ့ပါတယ်...

လမ်းမကြီး မော်-သံလမ်း၊ တန်ဆောင်တိုင်ည

                 မီးထွန်းတဲ့လမ်းတွေထဲမှာ တပင်ရွှေထီးလမ်း၊ (စာစင်အလယ်ပိုင်းရပ်)၊ အင်ကြင်းမြိင်လမ်း၊ လမ်းမကြီးမော်-သံလမ်း (ဈေးနားမှ ယခင်ဘီအိုစီရှေ့ထိ)၊ မြို့မဈေးနောက်လမ်း၊ ဘိုတဲအရဟံလမ်း၊ ဗိုလ်ချုပ်လမ်း (ဘိုတဲရှေ့မှ လမ်းမကြီးအ၀ိုင်းအထိ) ပိနဲတိုက်အ၀င်လမ်းများ၊ လမ်းမကြီးအ၀ိုင်းရှေ့မှ ကျွန်းရွာလမ်းသို့ ဖြတ်ထွက်သော ၀ိဇယလမ်း၊ ကျွန်းရွာလမ်းတစ်လျှောက် (လစရ-၂) အထိ၊ မော်-သံလမ်း၊ ဦးပိုးရီအိမ်ရှေ့မှ စာစင်လမ်းမကြီးအထိ) တို့တွင်သာ မီးထွန်းခဲ့သည်။ 

          ဇာတ်ပွဲများကျင်းပမှုကတော့ ယခင်နှစ်များအတိုင်းပဲ လမ်းမကြီးရွှေဟင်္သာဈေးရှေ့တွင် တစ်ပွဲ၊ ကျွန်းရွာလမ်းတွင်တစ်ပွဲ၊ ကျိုက်ကမော့တောင်ခြေတွင်တစ်ပွဲ ကပြခဲ့ပါတယ်... ကျိုက်ကမော့လမ်း တစ်လျှောက်တောင်ခြေအထိမှာတော့ လမ်းလျှောက်သူအနည်းငယ်သာရှိပြီး တောင်ပေါ်တက်ဘုရားဖူးဖို့ အတွက် ကား၊ ဆိုင်ကယ်များကို အသုံးပြုပြီး ည (၈) နာရီကနေ နံနက် (၆) နာရီအထိ အဆက်မပြတ် တက်ရောက်ခဲ့ကြပါတယ်..

 ပထမတော့ မုဒုံတန်ဆောင်တိုင်ည ဓါတ်ပုံတွေကို စုံစုံလင်လင်နဲ့တင်ပေးပို့ အများကြီး မျှော်လင့်ခဲ့တယ်.. အခက်အခဲတစ်ချို့ကြောင့် လက်လှမ်းမီသလောက်ပဲတင်ပေးလိုက်ပါတယ်.. ဘော်ဒါတို့ရေ စိတ်မရှိပါနဲ့...နောက်ဆိုရင် ဒီထက်ကြိုးစားသွားပါ့မယ့်.. ရပ်ဝေးမြေရောက်မုဒုံသားတွေလည်း အားလုံး ကျန်းမာကြပါစေဗျာ..

စတင်တေးဂီတဖျော်ဖြေမည့် မုဒုံမိုးလုံလေလုံအားကစားရုံမြင်ကွင်း (ညနေ (၄း၃၀) အချိန်

သင်္ဘောဦးဘုရားနှင့် ရှင်ဥပဂုတ်တရဟန်းသာပူဇော်ထားမှုမြင်ကွင်း (ညနေ ၆း၀၀) နာရီ

မသိုးသင်္ကန်းရပ်လုပ်ယှဉ်ပြိုင်မည့် ဆုတောင်းပြည့်စေတီတော်ရှေ့မြင်ကွင်း (ညနေ ၆း၀၀) နာရီ

လူများ စတင်စည်ကားစပြုလာသော မုဒုံမြို့ တန်ဆောင်တိုင်ည မြင်ကွင်း (လမ်းမကြီးအ၀ိုင်း ည-၇း၀၀) နာရီ

ရိုးရာမပျက်နှစ်စဉ်ကျင်းပမြဲဖြစ်သော မြန်မာ့ရိုးရာခြင်းအလှခတ်ပြိုင်ပွဲမြင်းကွင်း (လမ်းမကြီး ဈေးဟောင်းရှေ့နေရာ)

လူစည်ကားနေပြီဖြစ်သော ည (၇း၄၅) အချိန် တန်ဆောင်တိုင်ညမြင်းကွင်

ကျိုက်ကမော့ကလေးဘုရားသို့ တက်ရောက်မည့် ကျွန်းရွာလမ်းတစ်လျှောက် မြင်ကွင်း ည (၉း၀၀) နာရီ (အဆိုပါလမ်းမှာ တောင်ပေါ်သို့ ကားများ ဆိုင်ကယ်များနှင့်သာ သွားရောက်သူများပြားသဖြင့် လမ်းလျှောက်သူနည်းပါးနေပါသည်)

မုဒုံမြို့တန်ဆောင်တိုင်ပွဲတော်၏ ယခုနှစ်ထူးခြားသော ပြပွဲတစ်ခု (ပန်ချီကိုနွယ်တို့အဖွဲ့ဦးဆောင်သော ပန်းပညာရှင်များ၏ ချိုတေးသံဝင်းအတွင်းရှိ ပန်းချီပြပွဲ)

ပန်းချီပြပွဲတစ်ကွက်

ပန်းချီပြပွဲ မြင်ကွင်းတစ်ခု

ည (၁၀း၀၀) နာရီအထိ စည်ကားနေသော လမ်းမကြီး မော်-သံလမ်းတစ်နေရာ